Hai un mes, no Pleno Municipal de setembro, aprobouse por unanimidade, cos votos tamén dos representantes do Partido Popular, unha moción presentada polo BNG-Asembleas Abertas de Culleredo que demandaba da Xunta a declaración de urxencia na construción do novo colexio, para conseguir a súa entrada en funcionamento no curso 2016/2017.

Tras coñecerse estes días o proxecto de orzamentos da Xunta para o vindeiro ano 2016, resulta evidente que o Goberno Galego do PP ignora esta petición, pois divide a partida destinada á súa construción en tres anualidades (2016, 2017 e 2018), co que resulta evidente a súa intención de que o novo CEIP entre en funcionamento no curso 2018/2019.

En palabras de Tono Chouciño, voceiro do BNG-Asembleas Abertas de Culleredo, esta previsión resulta "totalmente inaceptábel para calquera persoa que defenda unha educación pública de calidade", tendo en conta a saturación existente xa a día de hoxe nos centros educativos de Culleredo, e que a vista dos datos demográficos aínda é susceptíbel de empeorar.

Ante esta situación, o voceiro nacionalista anunciou que o BNG presentará no Parlamento Galego unha emenda aos orzamentos para dotar convenientemente a construción do novo centro "como xa fixemos hai un ano, e non nos cansaremos de facer até conseguilo".