Segundo puido saber o BNG, logo de examinar o expediente, a execución da obra do muro de contención no río Trabe ten un requerimento do Xulgado nº3 por unha denuncia do servizo do PACPRONA da Garda Civil, por non axustarse o executado co proxecto aprobado.

Soubemos tamén da apertura de expediente sancionador por parte de Augas de Galiza, por obras sen autorización dese organismo, obras que incumpren o autorizado no expediente tramitado polo Concello.

En ambas casos confirmaríase o que o BNG de Culleredo ven denunciando dende hai tempo: o cambio na inclinación do muro de contención. Esta modificación, sen facer novos cálculos, pode afectar á estabilidade da obra, podéndose repetir os desprendementos que se pretendían resolver.

Tono Chouciño, voceiro do BNG en Culleredo, lembra que cando se proxectou, se licitou e se empezou a executar a obra, o Concelleiro de Obras e Medio Ambiente era o actual Alcalde. "Lamentamos que lle puidera a soberbia e non nos fixera caso, nen fixera caso dos informes contradictorios de técnicos municipais. Agora ábrenlle un expediente sancionador desde Augas de Galiza que pode derivar nunha sanción de 30.000€."

De producirse sanción o BNG de Culleredo pedirá a repercusión patrimonial ás persoas responsábeis e de idéntica forma no caso de que haxa que desmontar e volver facela. "Cos cartos públicos non se pode estar a xogar. É unha obra de 140.000€ e non pode ser que se tome con tanta frivolidade", afirmou o concelleiro nacionalista.

O Concelleiro do BNG lamentou non ter podido acceder a toda a documentacion do expediente, xa que cando foi posto á súa disposición non estaba na súa totalidade, numerado, ordeado e rubricado tal como é obrigatorio. "Isto obríganos a volver a pedir outra vez toda a documentación en debida forma, algo típico no xogo dilatorio que leva a cabo este Goberno Municipal para dificultar a labor da oposición".