Dentro do traballo encamiñado a achegar o goberno do Concello á veciñanza, e tratando de levar a todos os rincóns do mesmo o espírito participativo do que naceron as Asembleas Abertas do BNG de Culleredo, nos vindeiros días van comezar a desenvolverse uns Encontros Abertos cos veciños e as veciñas dos distintos lugares e parroquias de Culleredo.

O primeiro deles terá lugar en Boedo, o mércores 30 de setembro, ás 20,00 h. no Centro Social, sendo as seguintes xuntanzas en Sésamo (venres 2 de outubro, ás 20:00h no Centro Cultural ), Castelo (mércores 7 de outubro ás 20:00 h. no Centro Cívico) e Orro (xoves 8 de outubro ás 19:30 h. no Centro Social).

Nelas daremos conta do traballo desenvolto, e tentaremos recoller as propostas e as demandas que os veciños e veciñas nos queiran facer chegar, para o seu estudo e elaboración de iniciativas e emendas aos orzamentos que se están comezando a elaborar a día de hoxe, tal e como xa fixemos coas emendas presentadas aos Orzamentos Xerais do Estado para 2016.