O Goberno Municipal convocou o pasado xoves un Pleno Extraordinario co único obxecto de aprobar un trámite necesario para o prometido Centro de Día de Celas. Este Centro de Día era un vello compromiso esixido pola Comunidade de Montes de Celas polo convenio para extraer auga do monte, e unha necesidade coa que o BNG de Culleredo está plenamente de acordo.

Malia os 4 anos pasados dende que se comprometaran coa Comunidade de Montes, o Goberno municipal negou xa que o que finalmente se levará a cabo sexa o que se encadra na definición de "Centro de Día". Segundo o Alcalde José Ramón Rioboo, o que se fará "é un centro rural dinamizador de persoas maiores e que non ten nada que ver cun centro de día".

Para o BNG de Culleredo trátase, máis unha vez, dun engano do actual equipo de goberno do PSOE á veciñanza do noso Concello. Confírmase, lamentablemente, o que xa se advertiu hai 4 anos, que o convenio asinado polo Concello coa Comunidade de Montes era papel mollado, pois non contaba cos preceptivos informes para ter validez legal.

O BNG de Culleredo é consciente da necesidade de proporcionar coidados ás persoas maiores do noso Concello e ofertar ás súas familias posibilidades de conciliación. Por iso levaba no seu programa electoral traballar para acadar a posta en funcionamento dunha residencia e dun centro que aseguraran o respiro familiar e a cobertura desas necesidades.

Para acadalo é preciso un traballo rigoroso, para axustarse ás pautas e aos estrictos requisitos legais, que o actual goberno municipal é incapaz de realizar.

O BNG de Culleredo, a través do su voceiro, Tono Chouciño manifestou o seu compromiso coa veciñanza de Culleredo, "faremos propostas para que o que agardaba a xente se convirta en realidade. Estamos aquí para traballar a prol dos nosos veciños e non fuximos dos nosos compromisos, como fai Rioboo e os seus compañeiros de goberno".