142 nenos e nenas sen praza nas escolas infantís da Xunta
A elevada demanda de prazas nas escolas infantís repítese en Culleredo, quedando en evidencia a xestión da Xunta de Galiza na materia. O Consorcio de Servizos da Igualdade e Benestar publica que son 142 as familias que quedan nas listaxes de agarda nas tres instalacións, radicadas no Burgo, Vilaboa e Fonteculler.
En palabras de Raquel Jabares, voceira do BNG en Culleredo, queda máis que demostrado que as escolas infantís do municipio de Culleredo non dan para máis. A concelleira, responsábel tamén da área de Benestar, considera imperdoable que esta situación se reproduza ano tras ano sen que a Xunta tome medida algunha para evitalo, mellorando notablemente e con urxencia a planificación na apertura de escolas infantís en Galicia. Os criterios da oferta e da demanda deben primar á hora de decidir a creación de novas infraestructuras, sostén a nacionalista, que lamenta que ás veces sexan criterios discrecionais os que marquen estas políticas sociais na Xunta.
A primeira tenente de alcalde ten moi claro que a demanda de prazas que se rexistra en Culleredo debería empurrar a programar unha actuación para crear un carto centro, pero a conselleira de Traballo e Benestar parece non querer enterarse.
Jabares asegura que presentará a súa dimisión si se constrúe unha nova escola infantil en Culleredo e logo quedan prazas sen cubrir, dado que se demostraría que está realizando unha petición infundada :Nestes tempos de crise debemos promover os investimentos sostibles, baseados en necesidades reais, sostén a concelleira cullerdense.
O Concello de Culleredo aposta polo sistema de escolas infantís públicas para proporcionar un mecanismo inmellorable de conciliación da vida familiar e laboral.