Durante a visita que realizou hoxe venres ao recinto deportivo de Acea de Ama, en compañía do deputado no Parlamento Galego Luís Bará, na que puideron comprobar o estado de abandono no que están as instalacións, Tono Chouciño anunciou que o BNG de Culleredo solicitará da Xunta de Galiza a transferencia das instalacións ao Concello.

O candidato do BNG á alcaldía manifestou que "permitiríanos mellorar a xestión da instalación e abriría un mundo de posibilidades, promovendo deportes non maioritarios, e actividades de lecer ao aire libre, reforestando o recinto para facer del un auténtico pulmón verde no medio dun entorno fortemente urbanizado."

Tono Chouciño lembrou a existencia dun Plan Especial, que está por desenvolver, que establece os usos aos que se pode adicar cada espazo de recinto e protexe dun xeito especial o humidal existente, polo seu interese ecolóxico. "Dada a súa cercanía a recintos educativos, este humidal podería ser usado como un recurso máis para a educación ambiental."

Entre as melloras que as instalacións deportivas necesitan sinalou "a ampliación da piscina cun novo vaso, para dar o axeitado servizo tanto ás persoas usuarias como a clubes como os de natación, natación sincronizada, ou triatlón, que actualmente teñen que desprazarse a outros concellos para adestrar e competir en condicións aceptábeis."