O BNG de Culleredo denuncia o estado de ruína total no que se atopa o paseo do Río Trabe, que vai do Burgo a Vilaboa, que mesmo afecta á seguridade das persoas en varios tramos, situación xa denunciada con anterioridade, e para a que se pediu a inclusión dunha partida nos orzamentos da Xunta para a reparación dos treitos máis deteriorados, sen que até o momento nengunha das administracións implicadas tomasen cartas no asunto

Os principais perigos derivan do estado esvaradío do firme e das múltiples gretas e afundimentos que presenta o paseo, máis evidentes nas proximidades do Campo da Lavandeira e da Polideportiva do Burgo, onde o paseo cedeu e caeu sobre o río, co conseguinte risco para as numerosas persoas, sobre todo nenos e nenas, que acuden ás instalacións deportivas.

A limpeza sumamente agresiva, con desvío do cauce incluído, que o Concello fixo con maquinaria pesada a finais do ano pasado noutro dos treitos, provocou que o terreo das beiras do río cedera pola erosión das augas, ao eliminarse totalmente a vexetación sen desenvolver nengún tipo de medida correctora ou rexeneradora, e ameaza con novos derrubes.

Dende o Bloque Nacionalista Galego de Culleredo solicitamos de Xunta e Concello se tomen as medidas precisas para repor a estabilidade e seguridade do Paseo do Río Trabe, tendo en conta a gran afluencia ás instalacións escolares e deportivas existentes nas súas proximidades, ás que en breve se engadirá un novo colexio público, así como a reposición dos seus valores naturais, gravemente ameazados.